برص سنجل

-هو مافيش طريقة تانية نخرجه بيها غير كدة؟
-لأ، يا حبيبي.
-يعني عاجبك أقضي ليلة دخلتنا ماسك الشبشب وفاتح الشباك وبتحايل ع البرص يطلع م الأوضة؟
-تؤ.
-طب إيه طاه.
-هكلم سالي أسألها.
-هو انتي كل حاجة تكلمي صاحبتك الأنتيم تسأليها.
-ششش بقا، سالي، الحقيني، في برص في الشقة، أه، أه يا بنتي، طيب، أبليكيشن، ماشي، تمام.
-قالت إيه؟
-قالتلي أنزل أبليكيشن الميكروفون العجيب، وحاول يا بيبي تقنعه يخرج بقا وانت وشطارتك!
-نننننننععععم.
-اممم.
🐊👨

-من فضلك، اخرج عشان عايزين ننام!
-تؤ.
-لو سمحت، دي ليلة بستناها من تلاتين سنة!
-تؤ.
-حرام عليك بجد، ده انا طلع عيني لحد ماجبت شبكة ومهر وعفش وتوضيب ولا السيراميك، كله كوم والسيراميك كوم، طلع عيني!
-تؤ تؤ.
-انت عارف ان البرص أصله كان تمساح، بس من رخامته اتسخط؟
-تؤتؤتؤتؤ
-هو حضرتك تؤ دي، يعني لأ من بتوع مراتي ولا دي الديفولت بتاعة البرص؟
-أنا برص سنجل، اشمعني انت تتجوز وانا لأ، فاكس، مش طالع!
-سنجل، يا خبر، بص أنا لسه مكلم برصة وقالت انها سنجل برضه، يا محاسن الصدف، هي كانت جمب الشباك علي طول من برا!
-بجد؟، طب سلام، سلام، جايلك يا برصة قلبي.
-بااااي، هاهاها وضحكت عليك، مفيش برصة سنجل، هاهاهاي.

اشترينا مش هنبيعك -- الغايب كدبته معاه 5

-انت ليه مش قادر تفهم؟ أنا. بكره. الكدب

- يا حبيبتي دي كدبة بيضة

- بيضة ولا سودة، هتفرق في ايه؟ في الآخر كله كدب.

اللي سمعتوه دلوقتي ده جزء من الاهانات اللي بنتعرض لها كل يوم

بصراحة وهي بتقول كده، اتصدمت..

مسكت دمعتي بالعافية..

ده أنا بقالي معاها سنين

قوام كده نسيت؟

لما فركشت مع صاحبها وقالتله أن العيب فيها مش فيه، مين كان معاها..مش أنا؟

و لما كانت بتلطع صاحبتها بالساعات تحت البيت وكل ما تكلمها تقولها أنها "5 دقايق ونازلة"..

مين كان جنبها؟

برضه أنا

في الآخر تسوايني بكدبة سودة ماتسواش..

مع أني كدبة بيضة وألف مين يتمناني!

بس هنقول ايه بقى، هما البني آدمين كده بتاكل وتنكر.

كلهم يقعدوا يهزقوا فينا كده، وأول ما يقعوا في مشكلة يحتاجونا.

عشان كده، احنا قررنا أن احنا مش هنروح غير للي يقدرنا

اللي شارينا.. ومختارنا بنفسه.

نزل أبليكيشن كدبة بيضة دلوقتي من على الآب ستور، و اختار الكدبة اللي تعجبك

والغايب.. كدبته معاه.

اوعي تزعل حماتك

الحكاية ابتدت لما روحت اتقدملها، وأهلها ما وافقوش في الأول علي ان بنتهم تتجوز ف جبل عتاقة، أنا صحيح مهندس ومافيش حاجة تعيبني بس هنعمل إيه، دي بنتهم الوحيدة برضه..
بعد ما عرفنا إن مراتي حامل في شهرين، سافرنا نفرح أهلها، وحماتي قفشت إنها تفضل عندها لحد الولادة، حسيت ساعتها ان حد بيضربني علي دماغي، لأ، علي قفايا.
أقولها إيه، ده أنا بخاف أبات لوحدي، أخر مرة كنت نايم قبل الجواز لوحدي، صحيت مفزوع، شوفت البالطو متعلق ع الشماعة في الضلمة فضلت اصوت وافتكرته عفريت..
ولا البرص اللي كان ماشي بالليل في السقف وشوفته تمساح، يالهوي، أقولهم إيه بس!
ده كان هيبقي حالي قبل زوحليقة السرعة،
احنا رجعنا تاني ومراتي معايا، حجزنا في مستشفي الزحاليق الدولي، وأول ما "سميحة" شرفت، اتزحلقنا ف دقايق ووصلنا القاهرة، وهناك كل حاجة كانت جاهزة وعلي أعلي مستوي، ومن غير خطر الطيران او العربية علي البيبي، هتسألوني سميتها سميحة ليه، علي اسم حماتي، حياتي!

اتزحلق واوعي تزعل حماتك!
زوحليقة السرعة

البس قبل ماتلبس

امشي في الطريق للآخر وشوف ايه اخرتها .. بس انا خايفة اشوف حاجات تدايقني ومعرفش اتصرف ساعتها ولا اخد موقف ..! 

لازم تتعلمي تواجهي وتبقي جدعة وقوية والمكتوب هيحصل مهما عملتي ..

يعني ايه؟! 

يعني البسي الجزمة وماتستنيش وماتخافيش واكشفي كل اللي مدايقك واعرفي عدوك من حبيبك .. 

طبعا هو الانسان اصلا في طبع الحشرية والفضول وهتلاقي نفسك يافرحانة ومبسوطة وحبايبك طلعوا في وشك زي ظهرك ياهتزعلي شوية بس هتتعلمي تقفي لوحدك وتكوني ست بمية راجل مايهماش فراق ولا غدر ولا وجود حبيب ولافراق صديق ..

البس الجزمة قبل ماتلبس في واقع يدايقك ..

اعرف الحقيقة قبل ماتتصدم بيها .. 

الجزمة دي بس للجدعان.. 

خليك جدع والبسها ..

بميت راجل

بلد البنات،
كافيه بنات،
مدرسة بنات،
عنب بنات،
سكر بنات،
غزل البنات،
رحلة بنات،
قعدة بنات،
حاجات بنات،
حتي السكات،
سكات بنات،
بنات بنات بنات،
هي يعني الرجالة خلصت،
ولا قيمتهم ف عنين البنت قلت!
مانعرفش امتي ده حصل،
وليه الحال بينا وصل،
نحب يعني ولا نطولشي،
آن الأوان اننا مانزعلشي،
احنا نستاهل حاجة كويسة،
حاجة معمولة علي ايدنا ومتكلفة،
روبوت ذكي بميت راجل،
اشتريه وادفعي كاش او حتي آجل،
هدفنا خدمتك،
وراحة حضرتك..

روبوت، بميت راجل!

مابيعيشلهاش راجل

في الفرح...
-شوف ياختي الولية، عندها ستين سنة وسنانها اتخلعت وبتتجوز..
-مسكينة حبيبتي، كل ما تتخطب، ماكنش بيحصل نصيب.
-ليه اتخطبت كام مرة؟
-ياما، بطلنا نعد.. الأولاني كان مهندس علي بريمة، وقع فيها، العدو مايشوفهاش، شركة الزفت سفلتت بجتته صلاح سالم وكنا بنشوف ودنه ع الأسفلت.
-يالهوي، اللهم احفظنا.
-ولا التاني، كان طيار زي الفل، طيارته وقعت ف الغابة وفاقد الذاكرة لحد دلوقتي، جابته وهما قاعدين ف الكوشة فضل يتنطط زي القرود ويصوت زي طرران..
-ياعيني.
-ولا الأخراني، بعد الخطوبة عرفت ان عنده القلب، ويادوب من أول بوسة، داخ وسخسخ ودخل العناية المركزة، وحلف بعد ماخرج انه ماهيتجوز أبداً.
-يا حبيبتي، صعبت عليا، أومال القمر ده جابته منين؟
-مجدي!، ده روبوت.
-روبوت.
-أنا واصحابها ف الشغل قولنا نجيبلها هدية المعاش، لمينا من بعض وفصلناه، شبه آسر ياسين اللي كان نفسها فيه، وقولنا نفاجأها، أصلها يا حبة عيني مابيعيشلهاش راجل!

لو مابيعشلكيش راجل، خدي مجدي...

دايما معاك -- الغايب كدبته معاه 4

لو قلبت في ذكرياتك، هتلاقيها معاك من وانت في اللفة

"شبهك الخالق الناطق"

من أول مرة سمعتها فيها، بقت جزء لا يتجزأ من حياتك

برضاك..

"الشنطة دي فيها كتاب دين"

أو غصب عنك..

"الأكل ده هيجري وراك يوم القيامة"

بتيجي وقت ما تحتاجها بالظبط

"أنا عملت الواجب بس نسيته في البيت"

يعني تقدر تنقذك في أي موقف

"لأ طبعا ماتخنتيش"

و تريح اللي قدامك من غير رغي كتير

"الكاميرا بتتخن 2 كيلو"

شوف كام مرة فرحت حد..

"بكرة يجيلك سيد سيده"

وظبطت مود حد..

"لأ بس شعرك طول"

بقالها سنين بترَبط علاقات

"أنا ارتحتلك من أول ما شفتك"

و تكمل جوازات

"ديدو أنا اتقدملي 3، منهم واحد طيار"

وفي المناسبات؟ بصراحة عاملة الواجب وزيادة

"أنا في السكة أهو بس مزنوق عالدائري"

عارفين أنك دايما محتاجها معاك، وعشان كده خليناها أقرب و أسهل

ادخل دلوقتي على الآب ستور و نزل كدبة بيضة آب، هتلاقي آلاف الخلفيات و الساوند ايفكتس اللي هتساعدك تكدب الكدبة اللي محتاجها.

وتابعنا على هاشتاج #الكدابين_لبعضيهم عشان تعرف أكتر عن الأبليكيشن وآخر عروضنا، يعني عشان لو حابب تاخد فكرة و تكدب بكرة.

و الغايب..كدبته معاه.

النظافة .. مبدأ

وقفت سرحانة قدام الشباك تفكر في اللي حصل معاها من اول مالقت الجزمة .. وعرفت سبب خوف الراجل وهو بيتخلص منها .. سألت نفسها وصوت ضميرها هو اللي بيتكلم ياترى انا كمان لازم اتخلص من الجزمة ولا ممكن تبقى سلاح في ايدي اكشف بيه كل اللي عايزاه؟! بس هيا لسة عندها فضول لحاجات كتير واجابات لأسئلة كتير واكيد الجزمة دي لقتها لسبب، وبعد ماتعرف اجابات كل حاجة هتتخلص منها للابد بس مش وقتها دلوقتي.. دلوقتي وقت الاجابات ..

لبستها وراحت لحبيبها هتشوف بيعيش يومه ازاي من غيرها وبيعمل ايه.. كان باب الشقة مفتوح وبيدفع للديليفري ودخلت جوا .. قفل الباب وقعد ياكل وبعد ماخلص لحس صوابعه وهرش في دقنه "ااايييو" يامقرف كنت فاكراك نظيف وابن ناس، ماعلينا اما نشوف هيفتكر يكلمني ولا لا..! ايه ده بيتصل اهو والله ظلمته مش مشكلة انا هعلمه النظافة المهم انه بيحبني .. راح الحمام يحلق دقنه وكانت الصدمة ده بيلعب ف مناخيره 😫 وكمااااااان ماغسلش ايده .. لااااااااااا ده انا مستحيل اتجوزه ولا اسمحله يمسك ايدي كمان .. حاولت تقعد اكتر من كدة بس مارضيتش خافت تشوف حاجات تقرفها منه اكتر من كدة واللي شافته كفاية عليها .. "يعني كان لازم اختفي عشان اكتشف انه مقرف بس انا بحبه وعارفة انه بيحبني وساكن قلبي وعقلي وروحي ولو جت ع دي انا هفضل وراه لغاية مايحرم القرف ده.." ابتسمت في بلاهة ونطت من الشاك على الجنينة وروحت ..

احنا أصدقاء المخلوقات 2

تنويه عن المفقودين (تغيب الطفل أيمن محمود عن منزله من يوم الخميس الماضي وجاري التحقيق في الواقعة لإختفاءه من داخل المنزل، علي من يجده، يتوجه إلي منزل والده الكائن بفيلا 6 في المقطم، مكافأة مالية لمن يعثر عليه).
-ألو..
-ألو...
-أنا شوفت اعلان حضرتك عن الطفل المختفي، انا حصلي نفس المشكلة مع بنتي، واكتشفنا ان الفيران كانت خطفاها، بنتي أصلها طفسة، وكانت بتاكل الجبنة الرومي قدام الفيران وتغيظهم، قاموا خاطفينها بس اتفاهمنا معاهم ورجعناها...
-انتي مجنونة ياست انتي، فيران ايه وجبنة رومي إيه، يلا من هنا! ☎
فيران، والله ممكن!، ده الواد كان لسه متعشي ودخل ينام، ما يمكن عندها حق!
-محمود، أحبيبي، في واحدة كلمتني وبتقول إبننا الفيران خطفاه!
-هي هئ..
-مش يمكن عندها حق، نسيت الفار اللي ف المصيدة بقاله يومين، ده غير اللي قبليه!
-😳
-أنا هكلمها يا محمود!

-ألو..
-ممكن تفهميني عرفتي منين ان الفيران خطفت بنتك؟
-كلمتهم!
-ازاي؟
-الميكروفون العجيب، بتتكلمي عادي، وتدوسي علي زرار الحيوان اللي هتتواصلي معاه وهو بيترجم صوتك لذبذات، وبعدين تدوسي علي زرار الإستماع، بيحول ذبذبات الحيوان اللي قدامك لصوت!
📟انتوا خطفتوا ابننا ليه
📟انتوا اللي حبستوا المعلم رشدان
📟من فضلكم، رجعوا الولد
📟حطيلنا المعلم، مع كيلو جبنة رومي عند باسكت الزبالة اللي تحت الحوض
📟والولد؟
📟هتلاقيه جوا الباسكت 😂🐀

صاحبهم بدل مايخطفوا أيمن 👊

احنا أصدقاء المخلوقات 1

"يا ساتر، الشقة هدت حيلي، بقالي يومين بنضف فيها وبرش دوا الصراصير، أه طبعاً واخدة أجازة يومين من شغلي مخصوص، بالعافية لما مديري وافق عليها، هدخل أنام بقا يادوب عشان أقدر أصحي، بس ريحة الرش صعبة أوي وخايفة أهوي الشقة مفعوله يروح، طيب، سلام"
😴
-لو سمحتي،،
-اممممم
-لو سمحتي، ماشوفتيش مامتي؟
-مين اللي بيتكلم!
-انا صارو
-مش شايفاك، عايزة اناااام، همممم!
-من فضلك!، هي جميلة، وشعرها بني نازل علي عنيها، عنيها السودة اللي كنت بشوف نفسي فيها من اول ما اتولدت، بقالي يومين بدور عليها ومش لاقيها، حاسس ان جرالها حاجة!
-😳
-عيلتي الصراصير كلها راحوا المستشفي وبين الحياة والموت، بس مامتي اكتر حد فارق معايا، عشان كنت جايبلها هدية عيد الأم وعايز اعملها مفاجأة 😭
-😥
كابوووس، ياساتر، الصراصير بتتكلم، ده قطع قلبي 🐜، ياريت لو كان في طريقة تانية غير اني أرش الشقة واخد اجازة واهد حيلي وف الآخر صارو يتحرم من مامته!

احنا أصدقاء المخلوقات
صاحبهم وبلاش تقتلهم

زوحليقة السعادة

احنا أختين،
بقالنا سنين ماشوفناش بعض،
اخر مرة شوفتها كان في فرح ابني الكبير في شلاتين،
من ساعتها الدنيا شغلتنا وفضلنا نتكلم في التليفون،
كبرنا اوي، وتعب السفر دلوقتي بالنسبة لنا مستحيل،
لحد ما ابني فاجئني ف يوم اني هشوف اختي،
صرخت من المفاجأة "إزاي، امتي، فين!"
رد بثقة وقاللي "بساط الريح"
مافهمتش يقصد ايه، لحد ماخدني علي مطار الزحاليق، ركبنا من هناك وف لمح البصر لقيت نفسي في القاهرة،
روحت لأختي،
لقيتها هي كمان راحتلي شلاتين،
وأنا راجعة،
وفوق الزوحليقة،
لقيت أختي في الزوحليقة اللي جمبي،
مسكت إيدي،
وف ثواني رجعنا عيال من تاني...

سافر بالزوحليقة،
عشان كلنا عيال!

شهادة ضمان بابا

احنا أصدقاء المخلوقات 3

جزء 1
ززززززز
-هش
ززززز
-ده انتي نموسة مملة ومعندكيش دم..
ززززز
كفاية قرص بقا، حرام عليكي، مش كفاية اللي أنا فيه!
📟👧بس بقا، بطلي زن وقرص، أنا فيا اللي مكفيني ومش ناقصاكي الساعة دي!
📟🐜طب أجيلك الساعة كام؟
📟👧انتي هتهزري معايا، لأ ماتجيليش، روحي له هو!
📟🐜هو مين، أنا جعانة وعايزة أقرص فيكي شوية لحد ما أشبع وهسيبك تنامي!
📟😭حرام عليكوا، هو انتوا كلكم عليا، أنا ليه بيحصلي كدة، مش كفاية خطوبتي اللي اتفركشت وفرحي اللي باظ!
📟😥🐜اهدي بس، خلاص أنا أسفة، مش عايزة منك حاجة بس بطلي عياط، قوليلي بس أروح لمين وأنا هسيبك تنامي!
📟👧خطيبي، روحي اقرصي فيه شوية، هو يستاهل كل خير، وأدي عنوانه أهو!😭

جزء 2
🐜🐜🐜🐜
🐜سوسو حبيبي، عايزة منك خدمة، في واحدة صاحبتي بني أدماية، خطيبها سابها، وعايزاك تشكشكه وتطير النوم من عينيه وتقرصه وتورمله خدوده لحد مايروحلها راكع، ويرجعلها تاني!
🐜🐜يا حبيبتي مش قولتلك بلاش نكلم بني أدمين، خلينا احنا بس ف حبنا، وف جوازتنا وعشنا الجميل، يا سوسة يا نموسة قلبي.
🐜دي صاحبتي وعشرة عمر وياما شربت من دمها، عموماً كنت عارفة إنك هتكسفني، بس إعمل حسابك، جوازتنا كوم يا سوسو، وجوازة صاحبتي كوم!

🐜🐜🐜🐜
ززززززززززز  ززززززززز ززززززززز ززززززز
-هش بقا، ده انتي ناموسة رزلة أوي!
😞📟مش عارف أنا، ياشيخة، بطلي زن بقاااا!
📟🐜 اسمها بطل، انا سوسو، راجل علي فكرة، زيي زيك.
👨📟طيب يا سيدي، سيبني أنام يا سيد الرجالة، كفاية زن وقرص، مش عارف أناااام.
📟🐜لا تنام ايه، خطيبتي قفشت عليا وحلفت جوازتنا ماتكملش غير لما ترجع لخطيبتك، دي صاحبتها وفالقة نفسها م العياط عشانك!
👨📟لا اللي بتقوله ده مش ممكن يحصل، ماتتدخلش ف حياتي من فضلك.
🐜📟حياتك وحياتي مرهونين ببعض.
👨📟انت مش فاهم، دي زنانة ونكدية، انا بحبها فعلاً، بس ما اقدرش اتحملها!
🐜 طب حيث كدة بقا..ززززززززززززززز
👨📟خلاص خلاص هكلمها اصالحها، بس تسيبني انام.
📟🐜وعد.
👨وحشتيني، مش قادر اعيش من غيرك، تتجوزيني؟
👧بجد😳انا كمان بحبك اوي، اكيد اه!
النهاردة فرح نبيل ونبيلة وسوسو وسوسة...👸👨 👼👼

عشان ناموسة ممكن تصالحكوا علي بعض!
بدل ما أهاليكوا تتدخل وتزود المشاكل!!!

طارق الأسود -- الغايب كدبته معاه 3

ده طارق الأسود

طارق قابل صعوبات كتير في حياته بسبب اسم عيلته

سف كتير.. وافيهات أكتر

*نهارك زي اسمك* *أسود؟ اللهم أخذيك يا شيطان* *طب مفيش منك ألوان تانية؟*

لحد ما جه اليوم اللي قرر يغير فيه اسمه،

ويخلي كل أسود في حياته..أبيض.

طارق بطَل كاراتيه بعد ما رفضوا يبدلوله حزامه الأسود، بحزام أبيض.

ضحى بالشاي والقهوة، والسحلب بقى مشروبه المفضل.

علم مصر بالنسبه له كان لونين بس، أحمر.. وأبيض.

في عيد جوازهم ال 12، طارق نسي يجيب هدية للمدام

و تخيل رد فعلها لما تعرف أنه نسي يوم مهم زي ده

"ده انت ليلتك سوده"

وعشان يومه الأبيض مش هيكمل غير بكدبة بيضة، طارق نزل كدبة بيضة Application من على ال App Store، وفي خلال ثواني قدر يلاقي كدبة مقنعة بالصوت والصورة تصبرها على عملته من غير ما تسود ليلته.

عشان ماحدش يسود ليلتك، نزل كدبة بيضة Application دلوقتي من على ال App Store واختار مابين آلاف الخلفيات والSound Effects اللي هتساعدك تكدب الكدبة اللي تنسابك.

والغايب.. كدبته معاه.

الغايب كدبته معاه 2

عشان بقينا دايما مستعجلين في كل حاجة، حاجات كتير أوي بقت بتحصل في الثانية الواحدة.

 يعني ممكن في ثانية واحدة تترفد..

تترفض..

تتطرد..

و ممكن برضه في ثانية تتنسي..

تتساب..

"كداب" واحدة بتزعق في الخلفية.

مش بعيد برضه في ثانية واحدة تتعكش..

تتنكش..

تضِرب *ضحكة خفيفة* .. علينا دي

في ثانية واحدة ممكن تتكبس..

تتوكس..

وممكن تتفقس..

بدل ما يحصل كل ده، ممكن في ثانية واحد تنزل Application "كدبة بيضة" من على App Store

هتقدر عليه تختار من بين آلاف الخلفيات و الSound Effects  اللي هتقوي كدبتك

 و ممكن تشيل، تزود أو تغير أي حاجة في الصورة اللي هتختارها عشان تتناسب مع الكدبة

ده غير أنك تقدر تساعد غيرك في كدبته و تبيعله عن طريقنا الصور أو ال Sound Effects اللي ممكن تساعده لو مش موجودة عال App..

الكدابين لبعضيهم يعني.

             .والغايب.. كدبته معاه

الغايب كدبته معاه 1-- Kedba Beida App

-"صباح الخير" دخل على الاتش آر و هو ناوي يسمع الكلمتين اللي حفظهم في البيت، دي مش أول مرة تتعمل فيه و لازم يجيب حقه المرة دي

-أنا كنت عاوز اتكلم معاك في موضوع كده

=اتفضل يا حسين

-ازاي تخصملي يوم عشان اتأخرت 5 دقايق و محمد بقاله اسبوع مابيجيش و مستلم مرتبه كامل

=انت ماتعرفش اللي حصل لمحمد ولا ايه؟

-هو فيه حاجة معرفهاش؟

=محمد خبط بطريق عالدائري من حوالي 5 أيام، لو شفت منظره هيصعب عليك.. شايف الصور؟

-لا حول ولا قوة الا بالله

=و محجوز معاه في المستشفى من يوميها مستنيه يفوق

-دي حاجة ولا في الأحلام..

=و في نفس الوقت حقيقة، احنا بنلم من بعضنا و هنشتريله تلج.. بيقول محتاجه عشان يهيأله الجو في الأوضة اللي محجوز فيها

-خلاص تمام، أنا هروح أجيب العربية و أعدي عليكوا تكونوا جبتوا التلج و نروحله سوا عالمستشفى

=جدع يا حسين، يلا بينا

لكل حقيقة مش شايفها .. جزمة !

اكتشفت السر وابتدت تتأكد من السبب اللي يخلي الناس مش شايفينها .. ايوه هيا.. الجزمة اللي شافت الراحل بيتخلص منها وهو خايف .. اللي بيلبسها بيختفي بيشوف الناس ومحدش بيشوفه.. هو ده السحر اللي موجود فيها .. بس كدة .. هيا في ايديها سلاح محدش ممكن يعرفه.. وهتعرف جواب كل الاسئلة اللي حيرتها قبل كدة وهتكتشف كل الكدب اللي كان بيحصل قدامها .. الحقيقة اللي الناس مش عايزة تقولها في وشها والكلام الكتير الحقيقي اللي بيبقى ورا ظهرها .. الله لو الجزمة دي موجودة عندنا كلنا، كنا اكتشفنا اللي بيسرق واللي بيخدع واللي بيكدب واللي بيخون .. كنا شفنا الوش التاني لكل اللي بيحاول مايبنوش .. هيا حقيقي جزمة لكل المقاسات واللي بيلبسها بيشوف الحقيقة المستخبية .. مش محتاج مواجهة عشان تعرف الحقيقة، انت محتاج جزمة تلبسها تشوف الحقيقة .. 

لكل المقاسات

صحيت بدري على غير عادتها، جريت على الشباك وفتحته على الاخر، الجو جميل والشمس دافية والنسمة منعشة.. اتفائلت وحست انها علامة خير للي قررته امبارح قبل ماتنام.. خلاص استعدت للخروج وفتحت الصندوق وعينيها زغللت من الجمال "الله.. تحفة" ولبستها، وشبكت ايديها واتمنت تطلع مقاسها والمفاجأة انها طلعت زي ماتكون متفصلة عشانها.. كلمته وقالها انه هو نازل وهيستناها في المعاد زي مااتفقوا واول ماوصلت شافته، جريت عليه عشان تحكيله حكاية الصندوق الغريب، قعدت قدامه وضحكتله "ازيك" مفيش اجابة؟! ومش بيبصلها اصلا.. عادت تاني "انا هنااااا وبقولك ازيك" ونفس الحكاية.. اتخضت وخافت وحاولت تلمسه معرفتش، مسك الموبايل وكلم حد وبعدين اتأفف بازعاج "يعني مش كفاية اني مستحمل هبلها وتفاهتها وكمان ماتجيش في المعاد وماتردش عليا"..! ايه ده هو بيتكلم عليا كدة ليه؟! ومش شايفني ليه؟! المفروض انه بيحبني وبشوف ده في عينيه.. جريت برة الكافيه وكانت هتخبط في واحد وافتكرته هيزعق بس مشي في حاله وكأنه مفيش حاجة.. اتأكدت ان حصلها حاجة.. وانها ماشية ومحدش شايفها.. كدة كل حاجة اتغيرت، بالعكس كدة كل حاجة بانت ووضحت..

يتبع

زي ماما بالظبط 1

"معلش، انت مش أول واحد يحصل معاه كده..بكرة نحاول تاني" حطت ايدها على كتف جوزها اللي كان بيهز راسه يمين وشمال..عارف أن مفيش حاجة هتتغير

-يا شادي.. انت سامعني؟

=سامعك يا هادي

- لسه هناك؟

=لسه متنيل هناك، هو أنا قدامي حل تاني؟

-سمعت بتقوله ايه؟ نحاول! ده كل اللي قدروا عليه..

=طبعا، ماحنا لو كنا لسه في بيت أمه ماكنتش المهزلة دي حصلت

-انت بتقول فيها؟ دي كان زمانها نطت وراك وطلعتك من أضيقها زنقر في أقل من 10 دقايق

=دي مابقتش عيشة!

-طب على الأقل انتى مستخبي ولسه بهيبتك، أنا كل يوم و التاني ياخدوني يطقموني مع واحد مش شبهي ولا لوني ولا حتى براند معروف

=يا ساتر! دول زودوها أوي

-المشكلة أنهم بيعاملونا زي أي جوز شراب ضاع منهم، أوام نسيوا ذكريات خمس سنين

=ده احنا ماكناش بنتقلع من رجله يا جدع

-شكلنا هنفضل كده لحد ما الحاجة تزوره و بالمرة تشقر علينا..

=شكلها كدة يا صاحبي..

تراكر..زي ماما بالظبط

حلم ولا خيال

في يوم كئيب ممل وهي بتتمشى لقت نفسها في شارع طويل وهادي شجره طويل مضلل عليه وصوت العصافير مالي السكون، شافت حد بيبص حواليه في خوف كذا مرة وحط الصندوق في مكان مداري على الرصيف وجري، الفضول خدها وقربت تشوف الصندوق بس خافت ممكن يكون فيه قنبلة او طفل عايزين يخلصوا منه والتفكير جابها ووداها، قررت تتحدى خوفها وتفتحه.. وكانت المفاجأة؛ ايه ده!! شكلها حلو وبتلمع وجديدة ومش مكتوب عليها مقاس ولا ماركة! طب ليه صاحبها مش عايزها؟ وليه كان خايف وهو بيتخلص منها؟ خدتها مهي ملهاش صاحب وشافته بيسيبها لاي حد ياخدها وكانت هيا الحد ده.. روحت بيتها وهيا مليانة بالأسئلة والفضول واهو اخيرا جاتلها حاجة تلهيها، قالت لنفسها انا بكرة هكون بطلتها وهنزل بيها والكل هيحسدني عليها.. حطتها على جنب ونامت وهيا بتفكر بكرة هيكون شكلها عامل ازاي بيها وهيحصل ايه معاها وهتروح فين بيها؟! وغمضت عينيها ونامت..

يتبع

على الرصيف

- فاضل 3 ساعات على القطر يا أمي والنهاردة زحمة وده وقت خروج الموظفين، وإيه كل الشنط دي ده كلها كام يوم وراجعين. 

= يابني ده فرح إبن عمك عقبال مافرح بيك وتخلف بدل العيل اتنين. 

وصلنا المحطة طبعاَ متأخرين. فاضل يجي 1/3 ساعة، ده سفر 12 ساعة أرحم من سواقة في مصر ساعتين. 

أنجشت بأيد الحاجة وكمان شنطة والايد التانية  شنطة تانية على كيسين. 

- شدي حيلك يا أمي فاضل 5 دقايق وانا ماصدقت حجزتلنا تذكرتين. 

وفجاة صوتها جه من ورايا " حاسب يللا بسرعة مفيش وقت "،وفي اقل من ثانية خطفت مني شنطين. 

"عربية كام وكرسي ايه؟" جاوبتها وهي بتجري الخطوة في اتنين. 

= يابني لاتكون حرامية، قلتلها يامما  دول كام بشكير على غيارين. وطرت بالحاجة ده الحِمل خف كتير ويدوب دخلنا العربية لقيت الشنط وكل حاجة في مكانها فوق الكرسيين. طب هي فين ومين.. مالقتلهاش اثر؟ كان نفسي اقولها يا بت يا جدعة انتي ماتيجي معانا ونعمل بدل الفرح فرحين.

متوالية إتفووو

متوالية "إتفو"
بعد الزحمة ما فكت ويادوب جابت سرعة 90، طلع واحد من وسط العربيات قدامها، فرملت فاجأة وقالت "ما في سلم مشاة، إتفووو".

عدي منها وشاور للعربية اللي بعدها، حاول السواق يفاديه بس اللي جمبه زنق عليه، فتح شباكه وبص ع اللي سايق جمبه وقال، إتفووو".

اللي جمبه كان زانق عليه عشان قدامه حفرة، بص للحفرة وقام قايل، إتفووو".

في الحفرة عامل بسيط، بيصلح ماسورة مية، مانامش من يومين، سأل علي أجرته، قالوله كمان يومين، رد وقال، إتفووو".

فوق كوبري المشاة، طفل باصص، شايف الحدث، شاف كل واحد ورد فعله، قال عليهم كلهم، إتفووو.

تمن العربية

بشتغل عامل بُنا، بيحمّلونا علي عربية نص نقل زي البضاعة، زمايلي وأنا.
شوية الدنيا تمطر علينا، وشوية الشمس تهري فينا.
بحسد كل اللي عربياتهم مقفولة عليهم،

لو أعرف دول مين،
بيجيبوا تمن العربية منين!

في زحمة النهاردة، الإزاز اتفتح...

قالت "بشتغل صيدلانية، دي أخر فرصة ليا، يا أحقق، يا يطالبوني بتمن العربية"

قال "دي الشغلانة الأخرانية، لفيت علي عشرين شركة النهاردة ومش حاسس برجليا"

قالت "الولد عدي سن الحضانة، هو أنا كنت بربيه عشان أبوه ياخده بكل بساطة!"

قال "دي عاشر أجازة من الغربة، بحلف اني عمري تاني ما هرجعها!"

كنت بحسدهم، بس الزحمة خليتني عرفت منين جابوا تمن عربياتهم!

الحادثة

-"الدنيا زحمة، أنا جاي أهو، يلا إقفلي السكة بدل ما أخد مخالفة محمول، هتأخر آه، باينها حادثة".
-"أيوة يا حبيبي، إعمل انت السلطة، أنا ربع ساعة وأكون عندك، أيوة الأكل ف التلاجة بس ع التسخين، مسافة السكة، شكلها حادثة"
-"إمسكي نفسك يا شوقية"، "هولد يا تامر، مش قادرة، عااااااااااا"، "لأ أبوس إيدك، ده احنا شكلنا مطولين وفي حادثة"
-"الدنيا حر أوي، حاسة إن خلافنا المرة دي مش عادي، غالباً هنتطلق، مش عارفة إمتي هبطل أكلم نفسي، الله يخربيت الحادثة"
-"إنت يا أستاذ، ما تلزم حارتك يا أخي، عمال ترمي هنا وهناك!"
-"لا مؤاخذة يا باشا، العربية بتحدف، حق علينا، هبعد عن عربيتك بس نعدي الحادثة".
-"يا أسطي معاك أربعة من عشرين وبقالنا ساعة بنقولك هات الباقي"
-"هبعتلك الباقي بس أفك من أي حد، بقالنا نص ساعة واقفين في الزحمة عشان الحادثة"
الطريق فتح...
بيشوفوا شاب قاعد علي ركبته، بيلبس بنوتة جميلة دبلته، حضنها وباسها وحضنته.
تنحوا كلهم لبعض، كانوا فاكرين في حادثة، بعد ماشافوا كان ليه بقالهم ساعة واقفين، عملوا حادثة!

Break Up

Is this how u let girls go!
You tell her "Someone better will find you".
I don't think I want someone else.
I will hold on and that's so true.
Ain't saying what I don't mean.
What I tell has came to life as a scene.
When you were sick, I was always there.
When you were broke, I didn't go anywhere.
I love in bad n good, this will never mere.
After all you don't pick my calls, oh, well, this is not fair.
If you try to push me away, I will go, you never shown any care!

No End

Never too bad, never too good. 
In between she let me stood. 
When am so down, she lights a led. 
Like a prostitute she shows one hip. 
Tempting!, she gets my mouth zipped. 
Meeting new people makes us all into the game. Soon people hurt and some tend to blame "NOT MY FAULT, IT WAS YOURS, ARE YOU INSANE!". Was I the missing part of thier puzzle?
Those ideas keep running through my mind and leave me so dizzle. 
Was, still, will wonder why should I live it. 
Am sure it's a fair game and this's what I think. 
It will get you drown, but won't let you sink.
This is my story that has no end!

فرح بنت العمدة

من أول مافتحت عنيا ع الدنيا، وإحنا عايشين ف نفس البيت مع بعض.
أبويا وأمي، إخواتي الكبار والصغيرين، عمامي وعماتي، حتي خلاني وخلاتي. 
نصحي يوماتي من الفجر علي صوت أبويا، نسبح ونشكر، ماهو  أدانه يصحي أي حد ولو في سابع نومة. 
في يوم زي كل يوم، لأ مش زي كل يوم...
سمعنا طبل وزمامير، وشوفنا أنوار بألوان السما السابعة، وضرب نار في السما والكل فرحانين. 
بصينا من البلكونة وعرفنا إنه فرح بنت العمدة. أول فرحته، عمل زفة وعزم أهل البلد كلهم ع العشا، إتزوقوا الستات وإستعدوا عشان يحضروا الفرح.
فجأة، دخلوا علينا أهل بيت العمدة، قالت مراته "لموا كل الفراخ المريشة وسيبوا الفرخ الصغير ده عشان مافيهوش لحم".
قتلوا أهلي كلهم...
سابوني عايش وحيد...
ليه عشان تفرحوا تيتموني، ما كنتوا اكلتوا بانيه!

لادا 73

-ل س ع 123
=ز ف ت 456
-يا ساتر من أولها كدة الطريق واقف!
=بنكح تراب يا جدع وكمان محشورين ف الزحمة!
-نهارك فل، منين يا ذوق؟
=دهاشنة قبلي، والباشمهندس!
-معصرة... بتسافر يوماتي؟
=كل شهر!
-وموتورك مستحمل؟
=موتور لادا 73، قديم أه بس ربنا مبارك فيه!
-وده يستحمل سفر، قول لصاحبك يبطل بخل ويشوفله توصيلة تانية.
=مش بخيل،ده راجل شريف، ده اتعرض عليه رشوة مليون جنيه، حطوهاله علي كبوتي ولا ما أوعي أتفول، وهو رماهم ف الأرض وماقبلهاش!
-ياااااه!

مالهوش لازمة

زحمة.. والدنيا تضرب تقلب

محدش هيقدر يعدي حتى لو اتشقلب

ذنبها ايه الناس دي عشان في الشمس تتذنب؟

ده مالحقش امتحانه 

ودي مالحقتش عمليتها

ودول مالحقوش يطفوا النار اللي كلت شقتها

ساعات تمر على نفس الوضع اللي علينا اتكتب

يمكن تشريفة؟ يمكن كمين؟

أو يمكن لوري اتقلب؟

كله بيزعق في بعضه..

كله بيلوم في بعضه بس ماحدش يعرف أن أنا السبب

أصل ابن الباشا قاللي امبارح اني مليش لازمة

بتنقع في الشمس ساعات عشان المرور يعدي في سلام

وفي الآخر آخد بالجزمة

والله ما كان في نفسي يحصل أزمة

كنت بس عايزهم يعرفوا اللي ممكن يحصل..

لو يوم غاب عن شغله عسكري مرور "ملهوش لازمة"

ضرب للركب

مشيت على رجلي وبحمد ربنا مش راكبة عربية، اخر مابتجيب عيني عربيات مابتتحركش.. ايه ده في صويت وصريخ.. عربية كبيرة فيها اربعة بيتخانقوا .. اتنين ستات واتنين رجالة.. والضرب شغال على ودنه؛ شد شعر وتف وجزم بتطير .. حقيقي اللي انا شايفاه ولا فيلم كوميدي؟! نزلت الناس من العربيات تجري تفض بينهم.. استهدوا بالله ياجماعة وحدوا الله وصلوا على النبي.. الشارع كله نزل يتفرج؛ اللي بيشمت واللي بيضحك واللي مصدوم من اللي بيحصل .. واحد بيقول "وادي اخرتها ياعيب الشوم فضحتونا وسيرتنا بقت على كل لسان" وصوت جاي من ورا "يارب استر علينا" ناس كتير قالت "امين" .. 

مرايتي

وقفت أمام مرآه حمامها كعادتها كل صباح، نفس السؤال تسأله لنفسها " من أنا ؟".
تتأمل شعرها الطويل الداكن ذو الخصلات البيضاء، حتى بشرتها وكل تفصيلة في وجهها، ابتسمت وتذكرت كم كانت تتمنى مثل هذا الشكل الذي يفكرها دائما بأغلى امرأة في حياتها. 

- انتي هي فلا تستغربين. 

ترد مرآتها بكل ثقة 

- نعم هي بكل صورة لها خفة روحها وجاذبيتها التي تتغلغل بداخلك، ابتسامة وجهها التي تزيدها نضارة وجمال يشرق من بين عيناها كأشراقة خيوط الشمس بين السحاب في جو ممطر دافيء. الأمر ليس بيدك فأنتي امتداد لوجودها، هي رحلت بعيداً لا تنتظريها، هي بداخلك فلا تبحثي عنها خارجك.