دايرة الامان

يمكن انت اتعودت اني دايما بكتب وبقول اللي انا حاسه بيه ويمكن حاجات كتير من اللي بعتهالك مقريتهاش ومااديتهاش اي اهتمام .. بس انا المره دي غير عن اي مره قبل كده والكلام اللي هقوله ده غير عن اي كلام كتبته او قولته قبل كده ..

حسيت اني كبرت اوي وسنه بعد سنه وكل مشكله تحصل او حتى من غير مشاكل السنين اللي انت موجود فيها ومش موجود كبرتني اوي وحسيت اني لوحدي .. كل مره فيها تزعل او انك تتلككلي كنت بخاف اخسرك فيها .. بحس ان منطقه الامان عندي هتفضى ومش هيكون فيها حد .. معرفش ليه بشوفك منطقه امان يمكن عشان زمان انت كنت بتساعدني وتدعمني ويمكن عشان كبرت وبابا بعيد فمش حاسه بالامان ولقيته عندك .. كل مره تزعل مني بتجنن واصالحك مش عشان انا مهزئه ولا معنديش كرامة ولا مش حاسه بقيمة نفسي .. بالعكس عشان قيمتك عندي اكبر من كده رغم انك كل موقف مش بتعديه ولو حاجه صغيره تقولي خلصت وابعدي عني .. بس متفكرش انت كل مره تجرحني قد ايه وكل مره تحسيني ان اي حد احسن مني .. واني مهما عملت عشانك ولا حاجه .. اما جبتلك السماعات كنا فرحاااااانه اوي والله بس عشان اشوفك مبسوط لكن مرضتش توريني انك اتبسطت وعملت مشكله عشان جمله قولتها حلوه السماعات واتفضحت .. مشوفتش يوم اخر خناقه اني كنت نازله معيطه عشان كانوا مبوزين واتعاملوا معاك وحش مع انك اصلا مكنتش شايفني ومحستش ان انا كلمتك وجيتلك واتفشخت انا ف الاخر زي كل مره .. بلاش كل ده .. كل مره احتجتلك فيها والله كنت بقول شريف استحاله هيعرف انا عندي ايه ويسيبني ومايسألش عليا ومايقفش جنبي .. وكنت بتعمل كده عشان كنت بتفتكر اني بتلكك عشان تكلمني .. كل مره كنت بتهز وافضل اقول اعذار عشان انا عارفه من جوايا انك مش كده .. بس كل مره المواقف تقولي عكس كده .. رصيدك ف المعزه والافتقاد وكل ده بيروح ومش عارفه اتعامل ازاي وارجع افتكر كل حاجه عشان املاه تاني ..

انت يمكن مش بتقدرني وبتشوفني معنديش كرامه ومجنونه واستاهل ان انا اتساب واتهان وكل ده بس انا والله بشوفك احسن من اي حد وبخاف اقرب لاي حد يستغلني ويفشخني وانا مش ناقصه .. 

عامة لو كنت انا سبب ف حاجه تدايقك فانا اسفه والدنيا اصغر واتفه من ان حد يزعل ويخسر حد فيها ومش عايزه يجي يوم وتكون انت زعلان مني .. 

دي اخر حاجه هبعتها واخر مره هحاول اكلمك فيها لكن حبيت اقول اللي ف قلبي عشان ارتاح وتفهمني برضو عشان انت نسيتني ..